ಇವಳೆ...

ಕೋಟಿ ಸೂರ್ಯನ ಕಾಂತಿ ಮೈಗೂಡಿಸಿ ನಕ್ಕಳೊ,
ಇರುಳಾದ ಬಾಳಿನಲ್ಲಿ ಬೆಳಕನ್ನು ತಂದಳೊ,
ಹುಚ್ಚೆದ್ದ ಅಲೆಗಳಂತೆ, ಕನಸಿಗು ಹುರುಪು ಬಂತೆ,
ದಿಕ್ಕಿರದ ಹಾದಿಯಲ್ಲಿ; ಇವಳೆ ಚಂದ್ರಕಾಂತೆ!

ಸುಂದರಾ ಮುಖದ ಕೇಂದ್ರ ಅಗಲವಾದ ಕಂಗಳೋ,
ಅವಳ್ ತುಟಿಯ ಅಂಚಿನಲ್ಲಿ ಹಾಲ್ಜೇನ ಹನಿಗಳೊ,
ರೂಪ ರಾಶಿಯ ರಮಣಿ, ಮಿಂಚು ನೋಟದ ಮೋಹಿನಿ,
ಸಾರಂಗದ ದೃಷ್ಟಿ ದೋಚಿದ; ಇವಳೆ ಮೃಗನಯನಿ!

ಬಿದಿಗೆ ಚಂದ್ರನ ನಾಚಿಸಿವ ಡೊಂಕಾದ ನಡುವಿನವಳೊ,
ಮನ್ಮಥನ ಮಣಿಸಬಲ್ಲ ರತಿಯ ತವರಿನವಳೊ,
ವಾಸುಕಿ ಸ್ಪರ್ಶ ಧನ್ಯೆ, ಸಾಟಿ ಇರದ ಅನನ್ಯೆ,
ಬಳ್ಳಿಯ ನಿದ್ದೆ ಕೆಡಿಸಿದ; ಇವಳೆ ನಾಗಕನ್ಯೆ!

ಸುವಾಸನೆ ಸೂಸುವಂತ ಮಲ್ಲಿಗೆ ವದನದವಳೊ,
ಮುಟ್ಟಿದರೆ ಮಾಸುವಂತ ಕಮಲದ ತೊಗಲಿನವಳೊ,
ಕರೆಯದೆ ಬಂದ ವನಿತೆ, ವರವಾದ ಭಾಗ್ಯದಾತೆ,
ದುಂಬಿಯ ಮೊದಲ ಪ್ರೇಮಿ; ಇವಳೆ ಕುಸುಮಸಂಜಾತೆ!

-ರಮೇ